Sæla öndin

Ekkert helvítis sósíalista kjaftæði hér!

2012-02-20T22:59:00.000Z

Svo mörg voru þau orð hjá ritstjóra og eiganda Sunnlenska fréttablaðsins þegar ég gerði mig líklegan til að skera niður allar bollurnar sem hann hafði keypt handa starfsfólki blaðsins í tilefni bolludagsins.
Vinstrisinnaður og áttavilltur blaðamannssnepillinn (ég) hafði ætlað að gera öllum kleift að smakka sérhverja bragðtegund sem var í boði.

Hér étur hver maður það sem hann kemur höndum yfir. Svekk á hina,

drundi í ritstjóranum um leið og hann skóflaði upp í sig sinni fyrstu bollu.

Barnapössun og svefnfriður

2012-02-19T22:02:00.000Z

Sennilega búinn að passa á þriðja tug barna þessa helgi. Frá leikskólaaldri til menntaskólaaldurs. Svaf vært yfir þeim yngstu en gekk úr rúmi fyrir þeim elstu.
Þeir eru ómetanlegir þessir eiginleikar okkar karla að heyra ekki nema hluta af því sem gerist í kringum okkur og geta sofið af nokkur nánast allt sem gerist í kringum okkur.

Aldurinn, smaldurinn ...

2012-02-04T01:07:00.000Z

Við hjónin komumst að því að aldurinn er farinn að sparka í óþyrmilega í óæðri endann.

Við eyddum hátt í tveim vikum í að skipuleggja þessa helgi sem nú hellist yfir.

Bara til að uppgvöta að við gleymdum helmingnum af skuldbindingunum.

Sitjum nú í súpunni með allt saman á sama tíma og hressandi dag framundan.

Já aldurinn hefur furðuleg áhrif á minnið.

Ætli við munum eftir þessum degi eftir nokkur ár?

Fjörug helgi framundan

2012-02-03T00:03:00.000Z

Við eigum eftir að mála bæinn og fleiri staði rauða þessa helgi.

Spúsan verður með tónleika ásamt Hósku fyrir góðborgara svæðisins.

Snáðinn verður sennilega á fullu gasi um svipað leiti með barnakórnum.

Síðan verður brunað í Svallborgina, Krónprinsinn fluttur milli húsa og því næst haldið í Góugleði á tvímenningsafmæli mágs míns og hans ektakvinnu.

Sunnudeginum verður svo varið á málþingi og aðalfundi Upplits á Laugarvatni. Auðvitað :)

Jólagjafirnar komnar í hús

2012-02-01T22:16:00.000Z

Fjölskyldan fékk skemmtilegan glaðning í hendurnar í gær. Hvorki meira né minna en heilan jólapakka með áföstu jólakorti og umslagi.

Pakkinn fór í TNT-hraðpóstsendingu frá Hollandi 9. desember á síðasta ári.

Guði sé lof að hann fór ekki í venjulega póstsendingu. Þá kæmi hann væntanlega ekki fyrr en í desember 2012.
Eiríkur og Vassilis vissu svo sannarlega hvað þeir voru að gera þegar þeir sendu pakkann í hraðsendingu því þá var hann bara SEX vikur á leiðinni!

Kannski hefðu þeir bara átt að senda pakkann eftir jól. Þá hefði hann komið mun fyrr miðað við loforð fyrirtækisins:

Niðurstaða fyrirspurnar
	Upphafsstaður	Afhendingarstaður
Land	Netherlands	Iceland
Staður/ Borg	Amsterdam	Selfoss
Hérað
Póstnúmer	1099 zz	801
Þyngd	6 kg
Tegund sendingar	Skjöl
Tími sem óskað er eftir að verði sótt	22:13 01 feb. 2012

Vænt afhending sendingar
Þjónusta	Tími Dagsetning
Express (Docs)	18:00 06 feb. 2012

Sérsendingar
TNT býður einnig sérsendingar s.s. fyrir áríðandi lyf og hættulegar vörur.

Vinsamlegast athugið! : allar tímasetningar eru byggðar á áætluðum tíma skilmálar TNT eiga við flutning á öllum vörum hafa samband við þjónustuver ef óskað er eftir neyðarsendingum eða öðrum sérlausnum flutningstími er háður staðsetningu sendanda, þyngd og tollvirði vöru ásamt tollmeðferð frekari upplýsingar um hraðflutninga er hægt að fá hjá þjónustufulltrúum í síma 580 1010

Lífið ERg

2011-05-26T20:34:00.000Z

Kristur fæddist og Kristur dó.

Þannig varð til tímatal okkar og við það miðast öll okkar afstaða til lífsins og samfélagsins, jafnvel þótt við teljum okkur ekki vera kristin því samfélagsleg áhrif kristinna þjóða eru svo sterk.

Nú eftir að hafa skilað inn blessaðri ritgerðarskjátunni þá er ég loksins að hafinn á því verki sem heitir að koma lífinu í samt lag, líta í kringum mig og tala við fólk.

Það er því ekki rétt nema að tala um lífið Fyrir Ritgerð (FRg) og lífið Eftir Ritgerð (ERg).

Sá á kvölina sem á völina ...

2010-12-03T00:14:00.000Z

Við hjónin vorum að uppgvöta að á morgun kl. 19 þá verðum við horfandi á þetta

Því ákváðum við að mæta þangað rétt á undan.

Þar munum við kannski fá okkur þetta

eða þetta

eða jafnvel kannski þetta.

Við nánari umhugsun fáum við okkur kannski eitthvað allt annað.

Fullveldisdagur hvað? Þetta er Brúarhátíðin mikla

2010-12-01T23:28:00.000Z

Afskaplega hátíðleg og góð stund þegar við Tungnamenn hittum Hreppamenn við nýju Hvítárbrúna. Búið að bíða lengi eftir þessu því hrepparnir hér eru að miklu leyti mótaðir af löngum ánum sem kljúfa sýsluna ofanverða og erfitt að þurfa að keyra langan krók til þess eins að komast á stað sem maður sér við hliðina á sér handan árinnar.

Sunnlenska.is/Þórir Tryggvason

Brottnumdar (eða Brotthlaupnar?) Tungnakonur í Hrunamannahreppi héldu veislu við tilkomu brúarinnar og buðu öllum upp á kleinur og fleira góðgæti. Það var mikill fjöldi mættur á staðinn og allir keyrðu yfir brúarræsknið og nokkra skyldumetra inn í nágrannahreppinn áður en þeir snéru við. Nokkrir tóku líka til fótanna og röltu yfir brúna enda státar hún af breiðri og afstúkaðri göngu- og reiðhestaleið svo auðvelt verður að ferðast yfir Hvítá öðru vísi en á gúmmídekkjum.

Íbúahátíð við Hvítárbrú

2010-11-29T23:05:00.000Z

Frétti af félagsskap Tungnakvenna í Hrunamannahreppi í dag.
Þessar öðlingskonur sem titla sig sem "Tungnakonur búsettar í Hreppnum" sjá nú loks fram á að geta komist heim í gömlu sveitina án mikillar fyrirhafnar eftir að Hreppavíkingar hrifu þær upp á axlir sér og námu á brott í denn.
Þær ákváðu því í samráði við Gylfa Gíslason að fagna opnun umferðar yfir brúna og halda veislu á staðnum. Geri ráð fyrir að auglýsingin hér að neðan lendi hjá sveitunum kvennanna innan skamms.

Stefnumót við Hvítárbrú
Hvítárbrúin okkar langþráða verður opnuð fyrir umferð
miðvikudaginn 1. desember 2010.

Margir hafa sýnt áhuga á að hittast í tilefni dagsins og nú er lagt til að íbúar
í Hrunamannahreppi og Bláskógabyggð hittist á brúnni miðvikudaginn 1.
des. milli kl. 15:00 og 17:00, kíki á mannvirkið, spjalli saman, takist í hendur,
faðmist eða hvaðeina sem þeim dettur í hug að gera. Fyrirvarinn er lítill því
ekki var vitað um opnunardaginn, en ef menn vilja leggja eitthvað til er það
velkomið. „Tungnakonur búsettar í Hreppnum“ og JÁVERK bjóða upp á kaffi og
kleinur í vinnubúðunum vestanmegin árinnar.

Ath. Ekki er um formlega opnun eða vígslu brúarinnar að ræða, það gerist
2011, þegar öllum vegaframkvæmdum verður lokið. Þetta er einungis jákvætt
stefnumót íbúa beggja vegna brúarinnar.

Við legu mína undir dræsu

2010-11-28T23:16:00.000Z

Hef legið undir dræsu með höfuðið í drullupolli við leit mína að hugarlýsingu.

Menningarlegur ruslahaugur frá Spiegel-online

Um leið og ég hef kramið höfuðlýs og stækkað skalla minn hef ég hugleitt hvað orð ég geti notað yfir ruslmenningu.
Er ruslmenning besta íslenska orðið sem við höfum eða virkar lágkúra, ómenning, sori, sorpmenning, moðmenning, ruslbókmenntir? Erum við kannski bara svo alþjóðleg að best sé að nota trashy stuff?
Er það vitleysa hjá mér að tjá mig um ruslaralýð þar sem ég tilheyri honum eða eru útrásarvíkingar hinir einu og sönnu menningarsóðar? Er mörlandinn nú klórþveginn af allri spillingu við það að afvelta grísirnir í fyrrum æðstu og ríkustu stólum landsins eru nú hrundnir niður og liggja nú afvelta hjá okkur sem eru alsæl yfir því að geta bent eitthvað annað í sjálfskoðun okkar og sagt:

Oss erum heiðarlegur og sálhreinn. Þessi lágkúrulegi labbakútur tilheyrir nú ómenningu þessa fyrrum synduga lands á meðan vér tröðkum á þeim á leið okkar til yfirstéttar hámenningarinnar!

Nú skilur enginn baun í bala hvaða óyrði ég hef hér dælt úr mér en ég varð bara að létta á hugarfylgsninu eftir stöðuga þanka um ómenningu, viðbjóð og annað trassy stöff.

Þau hljóta líka að þarfnast peninga greyin ...

2010-11-25T22:57:00.000Z

Fékk "ákaflega ánægjulega" bréfasendingu frá tryggingafélaginu mínu fyrir nokkrum dögum. Þar var mér tjáð, á mjög vinsamlegum nótum en án nokkurra sérstakra útskýringa, að vel flestir tryggingaskilmálarnir hefðu verið hertir til muna. Ekki síst hefði málskostnaðartrygging á málaferlum gagnvart tryggingafélaginu sjálfu verið felld niður.
Að lokum tjáði blessað tryggingafélagið mitt mér það að ég yrði að borga fulla bílatryggingu fyrir bílinn minn sem ég afskráði og henti á haugana á miðju sumri.
Ég lagði snyrtilegu bréfin frá fína tryggingafélaginu afskaplega rólega frá mér og til að gera ekkert í fljótræði ákvað ég að telja upp að hæfilegri tölu áður en ég gripi til aðgerða.
Ég er enn að telja ...
en það er byrjað að rjúka út úr eyrunum á mér.

Handlaginn heimilisfaðir með lekanda

2010-11-25T01:22:00.000Z

Lekandinn mættur á heimilið enn eina ferðina. Svo sem ekki í fyrsta skipti. Glímdi við hann vikum saman fyrir nokkrum árum eftir mikið hoss og hávaða. En það hafðist að lokum. Eftir að ég hafði skipt um tromluna í þvottavélinni þá var hún til friðs lengi vel.
Næst tók uppþvottavélin við. Eftir flóð og útslætti í nokkrar vikur tókst mér að sjá við þvermóðskufullri dælunni og ég gat notið friðarins á heimilinu.

Þar til núna.

Nú flæða öll gólf í hvert sinn sem jólaþvotturinn skríður upp í vélina af sjálfsdáðum og ég sé sæng mína útbreidda. Miðað við fyrri reynslu af lekum-véla-viðgerðum er ljóst að Jólakötturinn fer saddur og sæll héðan þessi jólin.

Jólin skítarólin

2010-11-24T00:33:00.000Z

Hjálp! Spúsan gengur nú á lagið eins og glímukappi. Ég hef verið settur í tveggja klukkutíma jólaundirbúning hvern dag fram að jólum. Dísús. Gólfið á eftir að verða bónað niður í steypu og veggirnir ajaxaðir inn fyrir steyputeina áður en frúin slakar á.

Ættargrobb

2010-11-23T00:16:00.000Z

Ég á einn merkan frænda. Hef reyndar átt hann alla mína ævi. Hann er nefnilega nokkuð eldri en ég.

Þessi frændi minn átti afskaplega merkan forföður. Á hann víst ennþá því ekki hverfur forfaðirinn þó hann deyi.

Reyndar á ég þennan forföður líka. Hann er sameign okkar frænda míns.

Forfaðir okkar var um margt merkilegur kall. Því hann var jú karl. Ekki það að hann væri merkilegur vegna kynsins heldur gerði hann ýmislegt sem við afkomendurnir hömpum á tillidögum, þ.e.a.s. ef við munum eftir því.

	Guðmundur Jónsson		Guðný Ásmundsdóttir
	15. október 1849 - 6. febrúar 1918		4. ágúst 1853 - 18. maí 1920

Páll Guðmundsson	1887 - 1977
Guðný Pálsdóttir	1920 - 1992
Elín Ásta Skúladóttir	1947
Skúli Sæland	1966

Margumræddu ái má sjá hér á myndinni sem ég nappaði af Íslendingabók. Líkt og venja er þá eru sagðar frægðarsögur af ættingjum og áum, sérstaklega ef enginn getur rengt þær. Ein af okkar sögum er á þá leið að hann hafi skorið út þennan prjónastokk:

Ljósmynd Gunnar Sigurgeirsson

Ekki bara skar Guðmundur út stokkinn heldur gaf hann konu sinni, og formóður minni, Guðnýju Ásmundsdóttur gripinn og hann var síðar sýndur á sýningum þar sem listfengi Íslendinga var hampað.

Ljósmynd Gunnar Sigurgeirsson

Ef mögulegt er að stækka myndina þá má greina texta á miðanum ofan í stokknum þar sem stendur m.a. sýningarnúmerið 51 ásamt nafni Guðnýjar Ásmundsdóttur, Baugsstöðum, Árnessýslu, Íslandi.

Þá mega jólin koma

2010-11-22T00:24:00.000Z

Stórum áfanga var náð á þessu heimili nú um helgina. Jólaseríur voru settar upp áður en desembermánuður gekk í gang. Þetta er ákaflega markverður viðburður. Ekki síst vegna áhuga Spúsunnar á að fá smá birtu í skammdegið umhverfis húsið og bremsuförum bóndans um leið og orðið "Jól" glymur í eyrum hans.

Ótímabær tilkoma jólaljósanna má því skoðast sem velgengni Spúsunnar við að koma sínum skoðunum til skila, gatslitnum bremsum bóndans eða að einfaldlega hafi sá vægt sem vitið hafði meira.

"Afhverju þurfa þau glugga?"

2010-11-20T00:29:00.000Z

Skraddararnir tveir sem plötuðu kónginn, ráðgjafana og alla fullorðna í kóngsríkinu í sögu H.C. Andersens um Nýju fötin keisarans voru snillingar. Útrásarvíkingar þess tíma því þeir sögðust sauma fatnað úr dýrindis vef sem enginn sæi nema hann hefði til að bera gáfur og fleiri góða eiginleika.

Enginn þorði að bera á móti því að klæðin væru ekki til af ótta við að opinbera eigin ræfildóm og það var ekki fyrr en börnin bentu híjandi á kónginn sem sprangaði um á nærfötunum að fullorðnir áttuðu sig á því að ekki var um nein töfraklæði að ræða.

Þessi saga hefur beina skírskotun í Hrunsögu okkar og því verður mér alltaf hugsað til hennar þegar fjölskyldan rifjar upp ofangreinda setningu sem er að finna í titli þessa pistils. Þessi gullkorn hrutu af vörum Snótar okkar þegar hún var barn að aldri og við keyrðum framhjá húsnæði fyrir blinda og sjónskerta í Reykjavík.

Þessi ákaflega eðlilega spurning barnsins kom foreldrunum gersamlega að óvörum - sérstaklega vegna þess að hún sýndi aðstöðu og hugarheim sem við hugleiddum lítið. Barnið sá þetta hins vegar strax og hikaði ekki við að spyrja.

Guð gefi að börnin haldi áfram að spyrja - og ekki síður að foreldrarnir hlusti einhvern tíma á þau.

Sögufélagið kvatt - og þó

2010-11-19T00:38:00.000Z

Var að koma frá Húsinu á Eyrarbakka. Var þar á síðasta aðalfundi mínum hjá Sögufélagi Árnesinga sem stjórnarmaður. Nú er þátttöku minni í stjórn félagsins lokið og kannski eins gott. Búinn að vera þarna í níu ár.
Hef verið nokkurs konar fulltrúi uppsveitanna í stjórninni (ásamt fleirum) en í nýju stjórninni verður Elín Gunnlaugsdóttir dýralæknis eini fulltrúi uppsveitanna og sömuleiðs kvenna. Ekki vegna þess að ég hafi verið svo kynlegur heldur gekk eina konan í stjórninni, Inga Lára Baldvinsdóttir, líka úr stjórninni.

Ástæða brotthvarfsins var sú að mesti krafturinn var úr mér og hugurinn farinn að snúast meir um uppbyggingarstarf annars staðar svo sem við Upplit - menningarklasa uppsveita Árnessýslu og menningarmálanefnd Bláskógabyggðar. Búið að vera gaman að vafstrast í stjórn Sögufélagsins og nú hlakkar mig bara til að njóta þess að vera óbreyttur limur í félaginu. Það verður sennilega öðruvísi upplifun.

Minni gæludýra og annarra óskiljanlegra vera

2010-11-18T00:55:00.000Z

Sjaldan séð Spúsuna jafn þreytta og í morgun.

Batteríin voru gersamlega búin eftir annars frábæra tónleika kvöldið áður í Landakotskirkju með Kammerkór Suðurlands og Hilmari Erni. Þurfti bókstaflega að draga hana á fætur og þó að ég hellti í hana kaffibolla þá geispaði hún bara og studdi sig við mig áður en hún hélt á vit ævintýranna með nemendum skólans. Hana hlakkaði mikið til þess að hvíla sig eftir nánast daglegar kóræfingar og keyrslur til Reykjavíkur og Selfoss.

Annað var hins vegar upp á teningnum þegar heim var komið úr kennslunni. Uppfull af orku og lífsgleði var stefnan sett á næstu kóræfingu en núna hjá Skálholtskórnum.

Annað hvort er svona gaman að syngja - eða hún er með gullfiskaminni!

Verður reyndar hugsað til gamals brandara sem oft dynur á okkur karlpeningnum sem er á þá leið að ef karlmenn sæu um meðgöngu og fæðingar barna þá myndi mannkynið deyja út því við værum svo hræddir við sársauka. Við svörum náttúrulega sármóðgaðir fyrir okkur og sverjum alla sársaukahræðslu af okkur. Bendum hins vegar kurteisislega á að konur þjáist bara af Gullfiskaminni og Hana Nú.

Refsingar örvæntingafullra Poolara

2010-11-16T23:33:00.000Z

Var að skríða heim af Bumbubana æfingu hjá Axel frænda í Íþróttamiðstöðinni.

Ómögulegt að skilja hvers vegna hinir 18 karlarnir skráðu sig í þessa þrektíma. Ég var tilneyddur til að mæta því Spúsan gaf mér þessa puðtíma í afmælisgjöf af óendanlegri gæsku og visku sinni.

Í fyrsta skipti frá upphafi mætti ég örlítið of seint á æfinguna og því tók harðstjórinn upp á því að setja mig í refsingu sem allir aðrir ættu að horfa á til að sjá kvalir mínar - sér til viðvörunar. Hann lét mig síðan engjast í eftirvæntingu þar til tímanum var að ljúka og þá skellti hann "Suicide" á mig!
Fæstir vita náttúrulega hvað það er þó nafnið sé nógu hrollvekjandi. Æfingin gengur út á það að hlaupa vegalengdir sem lengjast stöðugt og reglulega þarf maður að beygja sig niður og snerta gólfið.

Ég hef reyndar komist að þeirri skoðun að það hafi ekki skipt nokkru einasta máli hvenær ég mætti á æfinguna því að ég var í bol sem merktur var Manchester United. Poolarinn, Axel, er náttúrulega í öngum sínum og sér bókstaflega rautt þegar hann sá mig í bolnum. Ef ég hefði mætt á skikkanlegum tíma þá hefði hann bara refsað mér fyrir að vera í bolnum.
Skil hann reyndar mjög vel. Þetta er svitaflík sem Prinsinn skildi eftir og ég nota til þess að skíta út með svita og ólykt. Það væri auðvitað allt annað mál ef ég hefði Arsenal silkiblússu til að veifa framan í Poolarana.

Foreldrar út á þekju

2010-11-15T00:22:00.000Z

Skemmtileg bæjarferð að baki.

Fór með Spúsunni og Snáðanum. Hann er orðinn ótrúlega þægur miðað við það sem áður var í bæjarferðum svo að þegar við foreldrarnir vorum önnum kafin við að spreða í Smáralindinni þá gaf ég honum leyfi til að fara í tölvu-/ leikjabúð sem var við hliðina á sukkbúðinni okkar. Hann hljóp af stað hæstánægður en við hjónin héldum áfram á fullu enda jólin á næsta leyti.Urðum nefnilega að flýta okkur að versla jólagjafirnar því annars yrðum við svo stressuð yfir því að vera ekki búin að versla jólagjafirnar.

Stuttu síðar rankar Spúsan við sér og spyr

Hvar er strákurinn?

Og ég svara ég hróðugur:

Hafðu engar áhyggjur. Ég veit alveg hvar hann er.

Innan við mínútu síðar hringir gemsinn. Þá hafði Snáðanum leiðst á örugga staðnum, hafið leit að okkur um Smáralindina og þar sem við vorum týnd og Tröllum gefin þá fór hann beina leið í upplýsingaborðið og fékk að hringja í glórulausa foreldrana.

Ef nennan stekkur á mig úr launsátri þá er ómögulegt að vita nema ég segi ykkur síðar meir af þessari ævintýraferð, s.s. týndu kreditkorti, þvermóðskufullum og uppreisnargjörnum bíl, ljúfri sundferð, æsispennandi fótboltaleik o.m.fl.
En nú er best að koma sér í háttinn á skynsamlegum tíma.

Göngur, hlaup og helgarhittingur

2010-08-12T22:28:00.000Z

Búin að vera fjörug vika. Við Spúsan fórum á þriðjudaginn í skemmtigöngu um Laugarvatn sem byrjaði með skyldubundnu falli enda var það fararheill - þó frúin bryti blómapottinn fyrir utan Bjarnabúð með hausnum á sér í fallinu.

Spúsan fann gnægð hrútaberja og fannst þau Æðisleg á bragðið

Framundan er viðburðarrík helgi. Eiginlega langar okkur að vera á sem flestum stöðum í einu. Mig langar á málþing hjá Gullkistunni á Laugarvatni þar sem m.a. verður fjallað um listamenn á Laugarvatni fyrr og nú. Síðan er náttúrulega árlegur Laugaráshittingur og svo er Laxárgljúfursganga sem okkur hjónin hreinlega blóðlangar í. Frábærar myndir frá gljúfrinu má sjá hér.

Svo verð ég náttlega að viðurkenna að ég lét verða af gömlum draumi og skráði mig sveitakarlinn í Reykjavíkurmaraþon. Lét að vísu 10 km duga en vona að ég komist í það minnsta í mark.

Þeir sem vilja hvetja mig í mark er bent á að standa meðfram hlaupaleiðinni en komist viðkomandi ekki eða skammist sín fyrir að þekkja mig þá geta þeir í það minnsta skorað á mig með áheitum sem renna til Gigtarfélags Íslands.

Barnabarnahittingur og fylgikvillum

2010-08-09T11:28:00.000Z

Mæðgurnar á góðri stundu

Helgin búin og komið frí frá ættar-, vina- og fjölskyldusamkomum í bili.

Kíktum sem snöggvast á notalegan stað sem heitir Hellishólar og er staðsettur í Fljótshlíðinni. Þetta er túristaparadís óákveðinna því þarna er boðið upp á alls kyns mögulega og ómögulega gistingu ef þú skyldir skipta um skoðun á síðustu stundu.

Við vorum hins vegar ákveðin - í að gista ekki. Snáðinn sat enn í tölvunni heima með pestarvott í sér svo það var ekki um annað að ræða.

Á Hellishólum voru fyrir barnabörn Ingibjargar á Spóastöðum, börn þeirra, öll makaflóran og alls konar viðhengi. Ekki má heldur gleyma yngsta barni Ingibjargar, Ragnhildi, sem svo sannarlega fílaði sig í botn.

Þetta var svaka fín skemmtun allt þar til tjaldvörðurinn kom til að skamma okkur, ekki síst gítaristann, og sagði alla vera sofnaða á svæðinu - enda var klukkan 30 mínútur liðin umfram miðnætti!!!

Skal viðurkenna að við þetta duttu nokkrar stjörnur af gæðastimpli staðarins þar sem óvanalegt er að fá ekki að vera í góðum hóp á góðri stundu fram yfir 2 á aðfararnóttu sunnudags - þó dempa megi vissulega gleðisöngva.

Síðan skutlaði Snótin okkur Spúsunni heim enda nýkomin með próf og meira en til í alls konar akstur.

Sjúklingar, skoðunarferðir og hrefnur

2010-08-05T23:44:00.000Z

Hér er sumri tekið að halla líkt og hjá fleiri samlöndum.

Pestir eru allsráðandi hjá ungviðinu. Snáðinn hóstar og er með hálsbólgu. Hefur ekki fengið að fara út fyrir hússins dyr í nokkra daga en hitinn hækkar bara. Ætli það endi bara ekki með því að við sendum hann út til að kæla hann niður.
Prinsinn haltrar hins vegar um eftir að að hafa rennt hýru augu til hjúkkanna á heilsugæslunni. Sá var svo sniðugur að til að finna sér erindi til þeirra lét hann grafa í tánni og fór svo til pilsaþeytaranna til naglasnyrtingar.
Það eru til sársaukaminni aðferðir til að skoða hjúkkur - verð nú bara að segja það.

Annars liggjum við Spúsan á meltunni eftir síðustu kvöldmáltíðina sem við deildum með Millu og Hjalta og kó. Hrefnan brást ekki frekar en fyrri daginn og við eru alsæl og södd.
Og auðvitað var gripið í Varúlfana í Wakkerdam.

Bláfell lagt að fótum sér

2010-08-02T01:41:00.000Z

Nú telst maður ekki vera maður með mönnum lengur, hvað þá Íslendingur, nema viðkomandi geti státað sig af fjallgöngu amk. einu sinni á sumri, helst nokkrum í mánuði.

Til að vera ekki eftirbátar annarra skelltum við Spúsan okkur með Agga og Gunnu upp hlíðar Bláfells okkur til ánægju og yndisauka. Hugsuðum okkur gott til glóðarinnar að þegar upp væri komið þá myndi útsýnið blasa við óhindrað allt til strandarinnar og um víðan völl til allra átta enda Bláfell hæsta jöklalausa fjallið á suðvestur hluta landsins og nánast á bersvæði.

Við kusum okkur uppgöngu á stað sem ber hið hughreystandi nafn "Illagil" og sóttist að vísu gangan vel þegar við vorum komin langleiðina upp á topp þá stökk þokan fram úr leyni og huldi blátoppinn.

Kvinnurnar snéru því við í 1000 m hæð en við heljarmennin örkuðum á leiðarenda og gott betur því kortið sagði Bláfellið 1204 m hátt en Garminið taldi okkur trú um að við hefðum náð í 1216 m.

Við sáum til sólar af toppi Bláfells

Sáum sólin en lítið annað og þó þetta hefði verið hressandi göngutúr er fellið ekki mikið fyrir augað að labba, því miður.

Vei þér Einstein, svei þér Bell, lofi þig Ford, ó nei Hawkings ...

2010-07-16T00:28:00.000Z

Tæknin er dásamlegt tól -
eða ætti ég að segja gufa.
Þvælist stöðugt fyrir og allt um lykur.
Ekki hægt að höndla, skrá né átta sig á.
Áttum okkur ekki á umheiminum nema fyrir tilstilli tækninnar -
eða sökum hennar?
Tímasparandi -
eða -eyðandi.
Peningasparandi -
eða -eyðandi.
Konur fussa, sveija og hlæja að henni
en karlar geta ekki án hennar verið.

Hæ, hó, jibbí... jei....... það er að koma 17. júní

2010-06-13T23:36:00.000Z

Snáðinn og frændi hans búa sig nú af kappi undir kassabílarallýið 17. júní.

Það er ekki nóg að þeir ætli sér að vinna keppnina heldur verður kassabíllinn að vera æðislega flottur og því var eftir þrábeiðni þeirra keypt málning og penslar svo hægt væri að flikka upp á gamla kassabílinn.
Enginn sem sér þessa frændur í dag kemst hjá því að taka eftir því að þeir hafa málað með blárri málningu og reyndar munu allir sem sjá þá á þjóðhátíðardaginn sjálfan átta sig á því að þeir sjálfir máluðu bílinn - því auðvitað var keypt alvöru lakkmálning.

Reyndar var það svo að foreldrarnir eyddu álíka tíma við þrif á veggjum hússins og málararnir við að skapa listaverkið.

Allt og ekkert

2010-04-18T23:41:00.000Z

Hér er margt að gerast eins og venjulega. Líkt og ávallt og alls staðar er þetta sjónarhorn og hugarfar sem ræður því hvort fólki finnst vera svo mikið að gera að það sér ekki út úr augunum eða hvort það hefur tíma til að gera þetta frekar en hitt. Þegar öllu er á botninn hvolft þá hafa allir tíma til að gera það sem þá langar til.

Því er ég nú að blogga um nákvæmlega allt þetta mikla sem var að gerast í lífi mínu sem er raunar ekki mikið en fullnægjandi samt. Er sestur við útgáfu Litla-Bergþórs ásamt hinum ritnefndarmönnum og við erum með fullt af efni en líkt og venjulega er mikilvægast að ábendingar um efni komi utan að því gullmolarnir leynast oftast utan sjónsviðs ritnefndar. Í stórborginni er uppsetning sýningar um stríðsárin í fullum gangi. Þetta er nemendaverkefni þar sem minn hópur er að setja upp herbragga með alles.
Snáðinn er búinn að vera lasinn í heila viku og ég held að takkarnir í lyklaborði tölvunnar séu að verða nokkuð slitnir af þeim sökum.
Prinsinn og Snótin skelltu sér hins vegar í skólaferðalag til Agureyrar til að njóta sönghátíðar framhaldsskólanema en þegar þangað var komið sá Prinsinn að skemmtilegra yrði að horfa á útlenskan knattspyrnuleik en horfa á jafnaldra sína spreyta sig á söng.
Spúsan spriklar þó við sönginn með Hósku enda skal eitthvað frábært vera gert í nánustu framtíð sem ég er löngu búinn að gleyma.

Páskar

2010-04-05T01:20:00.000Z

Fjölskyldan mætti til messu í dag.

Spúsan og Prinsinn sungu bakraddir við sérann.

Ég potaði öðru hvoru í sætisfélagann svo hann gæti staðið upp á réttum stöðum oþh.

Þegar kom að því að snæða líkama og súpa á blóði Krists fórum við þrjú saman til altaris. Sá stutti var afskaplega spenntur fyrir því að taka þátt í þessari athöfn og þó að ég segði honum að hann fengi ekki messuvín þá ætti hann sennilega að fá að smakka oblátuna.
Hann varð fyrir miklum vonbrigðum þegar Egill lagði höndina á höfuð hans og blessaði hann í stað þess að gefa honum oblátuna að borða.

Eftir messuna tók Egill hins vegar í hendina á mér og þakkaði mér kærlega fyrir sönginn - verð að viðurkenna að það er í fyrsta skipti sem ótvíræðum hæfileikum mínum í þá veru hafa þótt þakkarverðir

Gleðilega Páska

2010-04-04T03:00:00.000Z

Hinum árlega páskahrekk er lokið - he he.

Við foreldrarnir erum búin að vaka fram eftir nóttu við að semja kvikindislega þungar vísbendingar og þrautir fyrir börnin til að leysa í fyrramálið. Í verðlaun fá þau páskaegg.

Í staðinn skemmtun við okkur konunglega við að semja kvikindisskapinn og svo við að hlusta á kveinstafina í fyrramálið.

Já það er stundum gaman að vera foreldri :)

Reyndar eru unglingarnir með krók á móti bragði og byrjaðir að semja sambærilegan leik :(

Ill þrenna

2010-03-31T01:17:00.000Z

Snáðinn kom grautfúll heim af pöbbnum.

Wayne Rooney með þrennu!

Ég hváði við, ekki alveg viss hvernig ég átti að túlka lágstemmd fagnaðarlæti hans með Hat trick Rooneys.

Svo þið unnuð?

Nei. Töpuðum 2:1. Rooney skoraðir líka tvö sjálfsmörk.

Svona er nú stutt á milli frægðar og glötunar. Hetjan er orðin að glæpamanni.
Síðar sá ég mörkin og myndi nú ekki dæma hetjuræfilinn alveg svo hart en geri ráð fyrir að Snáðanum hafi snúist hugur eftir viku eða svo.

Sálarþrautir

2010-03-30T02:12:00.000Z

Fínt gluggaveður í dag enda voru allir innandyra. Of mikil innivera er sennilega ekki góð fyrir sálina - eða spilið Alias - því að nú fjúka blótsyrðin út um allt þegar kappið hleypur í skapið á keppendum.

Öskustrókur ofan úr afrétti

2010-03-29T02:36:00.000Z

Magnað moldrok í dag. Skyggni var lítið fyrr en komið var uþb. 5 km frá heimilinu. Í ljós kom að moldarstrókurinn kom í beinni brúnni línu ofan frá Hagavatni og yfir Reykholtið. Um leið og ég var kominn út úr þessum ófögnuði þá ók ég í bráðfallegu gluggaveðri. Var því meður ekki með myndavélina á mér.

Kom vel á vondan

2010-03-28T01:42:00.000Z

Þessa fáu daga í viku sem ég er heima dansa ég í kringum Spúsu og sýni henni mínar, err, bestu hliðar.

Eftir Snáðinn og ég tókum okkur til og hrærðum í pönnukökur í gær vissir um hve við værum miklir snillar - fannst henni vissara að koma okkur niður á jörðina með fyrirlestri um mismuninn á bollum og desilítrum í mataruppskriftum.
Ég meina það, hvernig á aumur sagnfræðingur að þekkja muninn á þessum eldhús-mæliglösum.

Næst bauðst ég til að passa börnin okkar og gríslingana hennar Hóskar á meðan kellurnar gætu rölt sér út í Bjarnabúð.
Mér var kurteisislega hent út með þeim orðum að mér væri ekki treystandi fyrir velferð ungra barnanna. Myndi sjálfsagt vera of upptekinn af sjálfum mér til að koma í veg fyrir að þau færu sér að voða.
Rölti því niður í Bjarnabúð en mér til skemmtunar, þegar ég kom heim, blasti við tvíbbi í nýjum fötum. Gat ekki annað en hlakkað í mér þegar í ljós koma að blessaður strákurinn lenti í svaðilförum og var bjargað af leikfélögum sínum á meðan kellurnar blöðruðu úr sér allt vit.

Myndin tengist málæðinu ekkert. Mér fannst mæðgurnar bara svo sætar.

Nemendur og kennarar

2010-03-25T02:11:00.000Z

Ég sat tíma í Árbæjarsafni í dagþar sem nemendahópurinn sat á rökstólum um væntanlega sýningu um Stríðsárin á Íslandi. Minn hópur sér um braggamenninguna, við setjum upp tvo bragga innandyra og verða þeir nk. hornsteinar sýningarinnar en þar verður margt annað ss. Ástandið, neyslumenningin og Hótel Borg. Sitt sýndist hverjum þegar kom að því að skipta upp plássinu í húsinu á milli hópanna en allt leystist það farsællega að lokum.

Spúsan er í skýjunum akkúrat núna. Var á meðal annars á stærðfræðikeppni grunnskólanna þar sem nemendur hennar unnu 1. verðlaun í bæði 9. og 10. bekk og þar að auki annar þeirra með fullt hús stiga.

Síðan fór hún með umsjónarbekkinn sinn á Gauragang í Borgarleikhúsinu þar sem allir skemmtu sér konunglega. Snáðinn var settur ósæll í pössun hjá ömmu sinni og afa en skipti fljótt skapi þegar honum buðust ömmubollur í kvöldmat.

Gamall fyrir aldur fram

2010-03-20T01:35:00.000Z

Átti skemmtilegt spjall við Öldung Smith úr Kirkju Jesú Krists í strætóskýlinu við HÍ í kvöld.

Öldungurinn sem er sennilega um 18 ára, talaði ágætis íslensku, enda búinn að vera hér í 14 mánuði við þrotlaust ark um götur og slóða Víkingalandsins. Hann gat frætt mig á því að í KJK var æðsti prestur og 12 postular sem allir hétu Öldungar.

Þegar ég spurði hann út úr Júdas, hvort hann væri ekki líka á meðal postulanna þá kvað hann nei við. Júdas syndgaði gegn Jesús og dó skömmu síðar. Hann gat því ekki orðið postuli um leið og allir hinir.

Þetta var núna farið að vera nokkuð áhugavert því mig langaði að forvitnast meir um synd Júdasar og hvort hann hefði ekki verið tilneyddur til að svíkja Jesús og þar með syndga líkt og nýlega fundið Júdasar guðspjall gefur í skyn.

En þá birtist strætó nr. 1 og trúboðinn sveif á braut með óspurðar spurningar á vörum mínum.

Fyrri myndin er frá 1843, er fengin af Wikipedia og er af Joseph Smith, Jr., stofananda KJK. Sú síðari sýnir koptíska handritið af Júdasar guðspjalli, er tekin af Kenneth Garrett, National Geographic Magazine en fengin af mbl.is

Forgangsröðun

2010-03-19T00:03:00.000Z

Snáðinn er yfirleitt ekki í samræðustuði þegar ég hringi heim til að spjalla við hann:

-Hvað viltu pabbi?
Tala við þig.
-Núna ertu búinn að því. Viltu tala við mömmu?/Bless
Hvað gerðirðu í dag?
-Ekkert

Og svo framvegis.
Yfirleitt get ég lagt tvo við tvo og fengið útkomuna = tölvuleikur

Fjölmiðlaathygli

2010-03-18T00:51:00.000Z

Er enn að súpa seiðið af fyrirlestri sunnudagsins.

Valdimar Bragason á Útvarp Suðurland á fm 96.3 fékk mig í stutt símaviðtal í síðdegisþætti sínum. Því miður virðist Útvarp Suðurland ekki geyma vistaða útvarpsþætti á netinu þannig að ég veit ekkert hvernig mér tókst til en amk. var ég ekki eins stressaður og í útvarpsviðtalinu við RÚV og sjónvarpsupptökunni með Magnúsi Hlyn.

Dettur ekki til hugar að reyna að halda því fram að mér finnist þessi athygli óþægileg - né sækist ég eftir henni.

Hins vegar skipti það mig miklu máli að finna svar við því hvað hefði orðið um heiðurspeningana og að aðilar á borð við Gvend á Lindarbrekku fengju þá áður en þeir féllu frá. Ekki síður finnst mér mikilvægt að fjölskyldur þeirra sem fengu ekki viðurkenninguna sem fólst í afhendingu hans á sínum tíma sé auðsýnt slíkt þakklæti nú. Því miður verð ég að viðurkenna að ólíklegt er að ráðuneytið fari að afhenda afkomendum látinna aðila sem áttu að fá Skálholtspeninginn hann að svo stöddu en vonandi pressar þessi fjölmiðlaathygli eitthvað á það.

Föstudagur til fjár

2010-03-13T01:30:00.000Z

Búinn að gera fjórar umsóknir og senda til Menningarráðs Suðurlands og þrífa tvö klósett - vel að verki staðið í dag.
Framundan verða vonandi til peningar í tvö meistaraverkefni, heimildamynd, rannsóknarritgerð, tvær fræðslugöngur og uppsetningu upplýsinga- og gönguskiltis.

Allir leggjast svo á skeljarnar og krossleggja knjúkurnar.

Þreföld þrenning

2010-03-12T00:44:00.000Z

Vorið er svo sannarlega að koma. Líkt og aðrir Icelendingar hendi ég þá allri varúð út í vindinn og hendi helstu vetrarflíkunum frá mér til að dansa um léttklæddur. Líkt og allir hinir skríð ég síðan skjálfandi heim.

Hvað um það. Heima er hægt að njóta þess að sitja saman og horfa á góðar myndir og núna erum við nýbúin að sjá mynd sem heitir "9". Sérkennilegt nafn og halda mætti að hún væri níunda myndin í röð af "1, 2, 3, 4, 5, 6, 7 og 8). Reyndar er svo ekki en þó er ekki loku fyrir það skotið að byrjað hafi verið á öfugum enda líkt og George Lucas gerði með Star Wars.

Geri þó fastlega ráð fyrir því þar sem myndin er hin besta fjölskylduskemmtun og byggir á því að lítil brúða vaknar til lífsins í heimi þar sem mannkynið hefur þurrkast út eftir átök við vélar. Hún finnur þó fljótlega fleiri svipaðar verur og hún er en einnig aðrar skepnur sem sem eru ekki eins vinalegar.

Úr verður hin besta skemmtun.

Með þér og án þín

2010-03-11T00:25:00.000Z

Sáum hjartnæma og vel gerða heimildarmynd With and without you á RÚV. Myndin fjallar um uppgjör konu og barna hennar við sjálfsmorði eiginmanns og föðurs. Fjölskyldan býr að því að þau voru nýkomin úr árslangri heimsreisu þar sem þau tóku mikið af myndefni upp á kvikmyndavél og þannig kynnumst við vel fjölskylduföðurnum og innra sambandi fjölskyldunnar.

Vel gerð og opinská mynd um sorg, þunglyndi og sjálfsmorð.

Orð um Skálholtsorðu

2010-03-09T00:11:00.000Z

Þá er dagskrá næstu helgar á tæru - svona nokkurn veginn.

Verð á sunnudaginn í Skálholti þar sem sýningin um Endurreisn Skálholts er til sýnis og flyt þar erindi um Skálholtsorðuna. Heiðursmerki sem var hannað sérstaklega og deilt út til velunnara Skálholts og til þeirra sem höfðu lagt hönd á plóginn við uppbyggingu staðarins.

Valdir voru 104 einstaklingar sem áttu að fá þessa merku orðu og má þar nefna Guðmund Indriðason á Lindarbrekku, Þorstein Sigurðsson á Vatnsleysu, Þórð Kárason á Litla-Fljóti og Sigurð Pálsson síðar vígslubiskup svo einhverjir séu nefndir.

Nú virðist hins vegar ljóst að ofangreindir einstaklingar fengu aldrei þessa mætu orðu.

Meðfylgjandi orða er fengin að láni hjá Myntsafni Seðlabanka og Þjóðminjasafns Íslands og var afhent Kristjáni Eldjárn forseta á sínum tíma. Hún verður til sýnis á sýningunni í Skálholti á sunnudaginn kemur.

Hvað gerðist?
Því verður reynt að svara sunnudaginn kemur.

Laugardagur til lausnar og sunnudagur til sælu

2010-03-08T00:52:00.000Z

Óvanaleg helgi afstaðin. Deginum var eytt í snjóhúsagerð með fjölskyldunni og gærdeginum við dyravörslu á kjörstað í fyrstu þjóðaratkvæðagreiðslu lýðveldisins auk þess sem ég prangaði yfirvaraskeggi inn á bæði karla og kerlingar.

Seinni dagurinn var skemmtilegur og allir nutu sín í botn og sá fyrri var notalegur og að ég held ákaflega lærdómsríkur bæði fyrir mig sem og alþjóð alla.

Þá á ég ekki við þingbjánana sem ekki skilja neitt frekar en fyrri daginn. Halda enn að ríkisstjórnarstarf, stjórnarandstaða og Alþingi snúist einungis um rifrildi og valdabaráttu.
Hafa ekki enn áttað sig á því að þetta snýst um siðferði, réttlæti og að hlúa að framtíð barnanna okkar.

Að ná til barna

2010-03-04T00:17:00.000Z

Snáðinn kom til okkar hjónanna um daginn með stjörnur í augum.

Vitið þið hvað!?
Mamma vinar míns getur hnerrað OG prumpað um leið!

Hvenær ætli við, gamla settið, náum að heilla orminn svona upp úr skónum?

Febrúar

2010-03-02T00:31:00.001Z

Febrúar,
originally uploaded by Ívar sæli.

Frændi minn, Ívar, hefur sett sér það aðdáunarverða markmið að taka amk. eina ljósmynd á hverjum degi út þetta árið og svo hleður hann myndunum á Flickr síðuna sína sér til hvatningar og forherðingar og öðrum til ánægju.

Hann er ansi liðtækur ljósmyndari og notar núna tækifærið til að prófa alls konar myndatökur og aðrir áhugamenn geta svo tjáð sig um myndirnar á síðunni hans, hrósað honum og hvatt til frekari afreka sem þeir og gera af krafti.

Það er ákaflega gaman að fylgjast með þessu og ég bíð spenntur eftir því að sjá hvernig hann á eftir að þróast sem ljósmyndari við þetta verkefni sitt.

Það tekur á að muna eftir því að taka mynd daglega - sá tam. í vikunni óprenthæf skilaboð frá kunningjastelpu sem ástundaði þetta sama en var svo önnum kafin við önnur ljósmyndaverkefni að hún gleymdi sér fram til 1:30 næstu nótt.

Gangi þér vel Ívar

Það er hægt að græða tíma!

2010-03-01T00:52:00.000Z

Mér til mikillar ánægju var ég að uppgötva Tímavél.

Hún virkar þannig að þú skráir fyrst dagsetningu verkefnaskila mánuði fyrr en þau í raun eru.

Vinnur svo eins og brjálæðingur við að skila af þér á "réttum" tíma - svo þegar þú uppgötvar hina dagsetninguna þá hefurðu ekki bara grætt heilan mánuð - heldur líður þér eins og að allt í einu skipti alheimurinn um ganghraða.

Í stað þess að vera á ljóshraða þá hægir skyndilega á og allt í einu geturðu litið í kringum þig og fundið kyrrðina og afslöppunina hvernig það er að hafa allt í einu nægan tíma.

Líkt og sjá má á myndinni sem ég fékk lánaða af fínni síðu, HowStuffWorks, má lýsa þessu þannig að eftir að hafa ferðast allan þennan tíma þá er ég kominn aftur á byrjunarreit eftir netpóstinn frá prófessornum. Yndisleg tilfinning.

Er þó ekki alveg viss um að ég vilji nota Tímavélina mína aftur í bráð ...

Það er þess virði að fást um Faust

2010-02-28T01:30:00.000Z

Fórum á Faust á föstudagskvöldið og heilluðumst af flugeldasýningunni. Fjörleg og óvenjuleg útfærsla á gamalli sögu. Það má vissulega segja að næmni og persónutúlkun verði útundan þegar leikarar þeytast allt í kringum mann, svífa um og djöflast í bókstaflegum skilningi. Þetta er hins vegar hrein og klár skemmtun með dramatísku ívafi og örvar skynjun manns öðru vísi en venjulega. Mæli með stykkinu.

Á myndunum sem voru fengnar af síðu Borgarleikhússins má sjá annars vegar Lilju Dögg Filippusdóttur sem Lilith rísa upp úr iðrum Helvítis og á hinni eigast bestu leikarar sýningarinnar, Þorsteinn Gunnarsson sem Faust og Hilmir Snær Guðnason sem Mefistó, við.

Menningarreisa

2010-02-26T00:06:00.000Z

Á morgun verður lagt á Hellisheiðina.

Við Spúsan erum á leið til stórborgarinnar til að forframast í hámenningunni. Meiningin er að kíkja á íslensku útgáfuna af Fást. Hlakka mikið til en nú þegar erum við búin að fresta sýningunni vegna annarra aðkallandi verkefna og við sjáum til á morgun hvernig heilsa og veður skemmta okkur.

Verð bara að segja það að kaup á fjögurra sýninga korti i Borgarleikhúsinu er bráðsniðugt og mæli með því með hverjum sem vill hlusta eða nennir að lesa þetta.

Ég er dásamlegur!

2010-02-24T22:28:00.000Z

Ég er íslenskur karlmaður!

Þess vegna kvarta ég ekki!

Jafnvel þó ég sé búinn að vera fullur af kvefi dögum saman, eigi erfitt með svefn, sé með stöðugan hausverk og sé kominn með lungnafylli af slími þá ...

Kvarta Ég Ekki !!!

Ég er nefnilega ekki eins og allir hinir aumingjarnir sem kvarta stöðugt og kveina!

Tímabundið

2010-02-24T00:45:00.000Z

Breytt tíð hjá Spúsunni. Hárið rúllaðist upp vegna hitamyndunar - vonandi tengist það ekkert loftvoginni frá því á Konudaginn ...

Annars er komið að því að tilkynna áfangasigur í uppþvottamálum.
Eftir sóknir og sigra, undanhald og skítaverk þá tókst að koma vélinni í gang og síðast þegar að var gáð þá virkaði hún. Reynslan hefur hins vegar kennt mér að fagna ekki fullnaðarsigri. Amk. ekki í bráð.

Konudagsgjöfin eina sanna

2010-02-21T23:55:00.000Z

Konudagur að kvöldi liðinn. Gaf Spúsunni þyngslavog og hlaut "þakkir" fyrir.

Snáðinn pantaði stóran og myndarlegan blómvönd af sjálfdáðum með nokkurra daga fyrirvara sem hann borgaði sjálfur fyrir með afmælispeningunum sínum.

Sé enn í iljarnar á minni og þeim stutta er leift að knúsa mömmu sína fram undir miðnætti. Algjörlega óþarfi að vera vondur við hann og reka hann snemma í rúmið ...

Leiksýning undir Hamarinn

2010-02-21T01:20:00.000Z

Fórum á leikritið Undir Hamrinum sem sýnt er af leikdeild UmfBisk í Aratungu í kvöld. Verkið er samið af Hildi Þórðardóttur og þetta var sannarlega skilgetið afkvæmi Hugleikshópsins.
Myndir af sýningunni má sjá hér.
Leikararnir stóðu sig vel og keyrðu sýninguna áfram af miklum krafti og farsakennd atriðin ollu mikilli kátínu á meðal gestanna sem fylltu salinn. Skemmtun sem óhætt er að mæla með.

Formæli föstudagsins

2010-02-19T23:23:00.000Z

Formæltum vel í dag. Snáðinn hélt forskot á afmælið sitt og bauð 18 skólafélögum og 1 frænda í afmælið sitt. Massor Pizzur a la Spúsa og síðan ávextabitar, óhollusta og túnfiskssalat. Smakkaðist merkilega vel saman.
Slepptum myndböndum og stafrænu diskum en drifum upp heimilisspilin. Af þeim reyndis Weerwolfen van Wakkerdam langvinsælast og krakkarnir spiluðu það aftur og aftur og neituðu að fylgja foreldrunum heim á meðan á spili stæði.
Það verður fróðlegt að sjá hvort afar og ömmur taka þátt í Varúlfaleiknum á afmæliskonudaginn

Lestrarfordómar

2010-02-19T01:13:00.000Z

Var að klára skáldsöguna Hið fullkomna landslag eftir Rögnu Sigurðardóttur sem vill svo skemmtilega til að er námsbók í safnafræði í Háskóla Íslands. Mér ber svo að meta siðferðileg vafamál og vafasama stöðu listasafnsins og aðalpersónunnar Hönnu listfræðings.
Bókin átti ágætis spretti og birtir fróðlega og skemmtilega sýn á málverkfalsanir, leiðir til að uppgvöta þær og vinna gegn þeim. Fannst hins vegar persónusköpun og samþætting sögunnar ábótavant.
Verð reyndar að viðurkenna að ég hefði aldrei lesið þessa bók ótilneyddur enda eru það náttúrulega örgustu fordómar. Eftir á er ég þakklátur fyrir að hafa prófað að lesa svona sögu líkt og þegar mér var þröngvað til að lesa Laxness í Menntaskólanum að Laugarvatni. Nú les ég hins vegar bækur hans mér til ánægju.

Algjör jólasveinn

2010-02-17T23:52:00.000Z

Búinn að versla gjöf handa Spúsunni á Konudag - eða gjafir réttara sagt. Eins gott að geta boðið nógu vel núna svo ekki verði fussað og sveiað líkt og gerðist á Valentínusardag. Ein gjöfin getur kostað mig löðrung, önnur hentar mér líka og ein nýtist best úti.
Vonandi er að frúin lesi þetta áður en margumræddur dagur rís og verði frá sér af forvitni, he he. Væri mátulegt á hana.

Líka kominn með smá glaðning handa sjúklingnum sem leiðist heima - enda missti hann af öskudeginum annað árið í röð - en það þýðir sennilega að í stað þess að stökkva um hálsinn á mér þegar ég kem heim mun hann ráðast á töskuna mína ...

Konur kyrja á Kaffi Kletti með Kvenfélagsdagatali

2010-02-16T00:01:00.000Z

Svei mér þá ef síðustu haustlaufin eru ekki tekin að fjúka af trjánum. Hressandi að fá loksins svona gjólu.
Helstu tíðindi dagsins er að frést hefur til Spúsunnar vera að plana söngskemmtan með tvíburasystur sinni úr Tungunum. Þær Hóska munu vera Svövu Theodórsdóttur til fulltingis á konukveldi á Kaffi Kletti þar sem almanaki Kvenfélagsins verður gerð góð skil. Þessi hresslega uppákoma verður í boði Upplits-Menningarklasa uppsveita Árnessýslu.
Kíkið endilega og njótið hressra Tungnakvinna á sjálfan konudaginn.

Safnakvöld

2010-02-15T00:39:00.000Z

Á föstudaginn var var Safnakvöld í Reykjavík. Spúsan og ég ætluðum að sjá leiksýninguna Faust sem hefur fengið fantafína dóma. Það kom hins vegar neyðarkall frá Kammerkór Suðurlands til mín og ég ákvað eftir mikla umhugsun að hjálpa þeim til við uppfærslu frábærs tónlistaratriðis þeirra, Hafþórs í Kammerkórnum og Sverris Guðjónssonar, sem var gert með afar tilkomumiklum ljósagjörnings Bill Fitzgibbons.
Eftir það fórum við Spúsan á röltið um nokkur af helstu söfnunum og skemmtum okkur konunglega enda fínar uppsetningar hjá m.a. Grafíksafn Íslands, Listasafn Reykjavíkur, Ljósmyndasafn Reykjvíkur, Minjasafn Reykjavíkur með Landnámssýninguna í Aðalstræti, Víkin-Sjóminjasafnið í Reykjavík, Þjóðminjasafnið og loks Norræna safnið þó við kæmumst ekki þangað fyrr en daginn eftir.
Þarna voru margar frábærar sýningar og góð atriði en sennilega er eftirminnilegastur gjörningur danshópsins frá Klassíska Listdansskólanum í Ljósmyndasafninu. Dansnemarnir mættu með málingaduft með sér í sýninguna og þegar við hjónakornin mættum klukkutíma síðar var danshópurinn og starfsfólk safnsins enn að þrífa grænflekkótt gólfið.

Kvöldpælingar

2010-02-12T00:52:00.000Z

Fékk mér hliðarvinnu í dag með náminu.
Þegar ég sæki háskólatímana í bænum nota ég hér eftir kvöldin til að geyma heyrnartól og hljóðnema á hausnum á mér og spjalla við fjölda fólks sem ég þekki yfirleitt yfir höfuð bara alls ekkert.
Skemmtilegra en ég átti von á.
Annað kvöld verður svo fjölskylduafþreying. Við Spúsan ætlum að skella okkur á Faust og síðan fara að dúlla okkur með börnunum á Vetrarnóttu. Hlökkum bara til.

Foreldraviðtal

2010-02-11T01:13:00.000Z

Snáðinn hringdi í mig í dag.
Var í skýjunum enda nýkominn úr foreldraviðtali (eitthvað hljómar þetta skringilega) og fékk glimrandi umsögn kennarans.
Við foreldrarnir finnum það að honum líður vel og það skilar sér strax í betra viðhorfi gagnvart námi og félagslífi - og reyndar hjá okkur öllum.

Ógæfa forfeðra við að lenda fyrir galdrakind

2010-02-10T00:09:00.000Z

Dagur að kveldi kominn.

Nýlega bloggaði ég örlítið um langafa minn og ömmu og þar sem ég hef gaman að forvitnast um hagi annarra - ekki síst forfeðranna - ákvað ég að blogga smá um ættina.

Sennilega er óþarfi að leita leiða til að enduruppfinna hjólið og því sótti ég efni af gömlu andvana Sælandsbloggi eftirfarandi færslu um Jóhann og Elínu:


     Jóhann Hannesson            Elín Magnúsdóttir
       1853 - 22. júní 1891           4. desember 1854 - 11. apríl 1944
Elín Jóhannsdóttir     1887 - 1980
Guðný Pálsdóttir     1920 - 1992
Elín Ásta Skúladóttir     1947
Skúli Sæland    1966

Þau hjónin Jóhann og Elín lentu í útistöðum við snauða kerlingu sem ekki var sátt við að vera rekin burt af gamla heimilinu sínu.

"Um þær mundir [~1870] bjó í Eyfakoti á Eyrarbakka Jóhann Hannesson frá Tungu, Einarssonar spítalahaldara í Kaldaðarnesi, atorkumaður og formaður góður. Kona hans var Elín Magnúsdóttir bónda á Baugsstöðum, Hannessonar á Baugsstöðum, Árnasonar, efnileg og dugleg kona. Það varð nú úr, að þau Jóhann og Elín fluttust að Baugsstöðum og fóru að búa þar. Vildu þau þá fá bæ Guðrúnar [Guðmundsdóttur] rifinn og byggja nýjan á sama stað. En það vildi Guðrún ekki heyra nefnt og aftók það með öllu. Því var þó ekki sinnt, og var bærinn rifinn móti vilja Guðrúnar, og urðu þau Jón [Björnsson] og hún að hrekjast frá Baugsstöðum. En daginn sem Guðrún fór þaðan, stumraði hún út að tóftinni, vappaði kringum hana, laut yfir rústina og tuldraði eitthvað yfir henni. Heyrði enginn, hvað hún sagði, en hitt vissu menn, að henni var ærið þungt í skapi. Byggði Jóhann þarna nýjan bæ. eins og ráð var fyrir gert, en þau Guðrún og Jón fluttust í verbúð eina úti í Stokkseyrarhverfi.

Skömmu eftir að þau Jóhann og Elín fóru að búa í nýja bænum á Baugsstöðum, brá svo við, að Elín, sem aldrei hafði kennt sér neins meins, varð undarlega veik, aðallega á sinninu. Lá hún rúmföst í tvö ár, þannig að hún mátti ekki á heilli sér taka, en var þó aldrei líkamlega þjáð. Á öðru ári, sem þau bjuggu á Baugsstöðum, bar svo við um Jónsmessuleytið um vorið, að Jóhann fór ríðandi út á Eyrarbakka. Kom hann ekki heim um kvöldið fyrir háttatíma, en engum datt þó í hug að undrast um hann. En morguninn eftir stóð hestur hans með reiðtygjum á hlaðinu. Var þá farið að leita Jóhanns. Fannst hann rétt fyrir vestan túngarðinn á Baugsstöðum, örendur og mikið skaddaður að kunnugra sögn, en lítið orð var borið í það út í frá. [Jóhann varð úti 22. júní 1891.] Var margt um atburð þennan talað. En af Elínu er það að segja, að hún tók að hjarna við upp úr þessu og varð aftur heil heilsu.

(Íslenzkir sagnaþættir og þjóðsögur II. Skrásett hefir Guðni Jónsson. Reykjavík, Ísafoldarprentsmiðja h.f., 1941. Bls. 25-6.)

Sæli andarunginn

2010-02-09T00:31:00.000Z

Snáðinn er núna í sælugír líkt og ættarnafnið reyndar ber með sér.
Hann tók það upp hjá sjálfum sér að taka almennilega til í herberginu hjá sér - ekki bara yfirborðslegt sóp undir rúmið líkt og allir foreldrar sætta sig stundum við. Nei, minn vann hörðum höndum í þrjá tíma við að þurrka ryk, henda dýnu út á ganginn og rúmi upp á endann (til að sópa undir því) o.s.frv.
Þegar þessum áfanga var lokið þá snéri hann sér að fataskápnum, henti öllum fatahaugunum sem þar voru á gólfið og braut og raðaði öllu upp að nýju. Græddi á því tvennar buxur og þrettán sokkapör sem höfðu verið til þessa álitin tröllum gefin og étin upp til agna.
Hann er núna afskaplega stoltur ungur maður enda unnið afrek sem gerir mörgum foreldrunum skömm til. Nú eru náttfötin geymd samanbrotin milli þess sem þau eru notuð á næturnar enda er allt í röð og reglu.

Til hvers eru vinir

2010-02-08T00:19:00.000Z

Búin að vera notaleg helgi með börnunum.

Reyndar var um fjarsamband að ræða við Prinsinn eftir að hann hvarf á vit skemmtana í Stórborginni. Hann þurfti hins vegar að læra undir próf svo að hann tryggði sér far til baka strax um laugardagsnóttina með góðum fyrirvara. Mikilvægt að þetta væri á hreinu og foreldrarnir voru afskaplega stoltir af fyrirhyggju Erfðaprinsins.

Um morguninn blasti hins vegar við tómt rúmið. Prinsinn ekki kominn og þegar samband náðist við hann þá kom í ljós að bílstjórinn hafði skipt um skoðun á síðustu stund og frestað ferðinni fram til sunnudagsins.
Prinsinn var hins vegar slakur því að tveir vina hans ætluðu yfir fjallið síðar um daginn.

Tveim tímum síðar hringir hann, bölvandi þessum svokölluðu vinum sínum, sem voru komnir langleiðina austur í sveitir en hann sat eftir í Stórborginni. Þeir höfðu bæði gleymt besta vini sínum og að kveikja á farsímunum sínum.

Þeir eru reyndar afskaplega líkir honum, enda góðir vinir hans.

Dagar sem vert er að muna

2010-02-07T01:41:00.001Z

Búnir að vera ævintýrlegir síðustu dagar.
Tók Snótina í kennslustund um hvernig á að bregðast við þegar maður keyrir út af í lausamöl á afleggjaranum að Seli. Prinsinn í námskeið hvernig á að hafa fyrirhyggju með bensínádælingu á bíl svo maður verði ekki bensínlaus milli Hrosshaga og Spóastaða. Tók síðan þátt í árlegu Spóablóti sem felst í því að gestir reyna að slá hvern annan út í því að hafa sem ellilegasta og bragðsterkasta matinn í veislunni.

Erfitt að vera ég

2010-02-04T00:09:00.000Z

Flakkaði um strætisvagna borgarinnar í kvöld.
Hitti unga dömu, hressa og málglaða, sem spjallaði um heima og geima við mig.
Hún var góðvinur strætó og virtist þekkja flesta bílstjórana með nafni.
Sagðist hafa unnið 12 tíma í fyrradag og 17 tíma í gær.

Já það er erfitt að vera ég

sagði hún og dæsti.
Núna var hún á leið heim til sín í agalega erfitt verk. Hún þurfti að skipuleggja íbúðina sína svo hún gæti verið með leigjanda án þess að hann væri inni í íbúðinn með henni.
Allan tímann sem hún spjallaði, brosti hún og hló.
Jafnvel þegar hún sagði það erfitt að vera hún.
Ég vildi að það væru fleiri líkir henni.

Það man ég best er mér sýndist verst

2010-02-02T23:54:00.000Z

Uppgvötaði loksins að ég gat skæpað af ferðatölvunni minni án aukabúnaðar. Það er afskaplega þægilegt að spjalla þannig saman og geta horft á sína nánustu á tölvuskjánum þegar fjarveran kallar á sambandstengingu.
Eitthvað þarf maður þó að venjast myndbandsglápinu af sjálfum sér. Við Spúsan áttum erfitt með að þola sjálfsmyndina sem sýnd var samhliða móttökunni frá viðmælandanum og spjallið okkar endaði í grettukeppni okkar á milli. Eftir á séð varð það minnisstæðasti hluti samtalsins okkar ...

Einstakt bókarán?

2010-02-01T23:20:00.000Z

Er að lesa stórskemmtilega bók þessa stundina, Bókaránið mikla: frásögn af ótrúlegum glæp, eftir Leu Korsgaard og Stéphanie Surrugue. Höfundarnir fengu blaðamannaverðlaun Berlinske Tidende 2005 vegna bókarinnar.

Það skemmtilega, eða hrollvekjandi, er að ég kannast við svona aðstæður hérlendis að einhverju leyti. Er ég sá eini?

Að sönnu er andinn reiðubúinn þó holdið sé veikt

2010-02-01T00:39:00.000Z

Kominn með bronsmedalíuna um hálsinn. Stoltur af strákunum okkar.

Þessir snillingar fóru langt á gleðinni og baráttuandanum. Sýnir hvað viljinn er reiðubúinn að draga kjötskrokkinn langt og þó aðstæður forbjóði það algerlega.
Minnir dulítið á Snáðann í fótboltanum í dag. Orðinn heitur og móður í frostinu. Þá var náttlega fötunum svipt af sér og hlaupið um nánast berstrípaður. Nú er hann stútfullur af kvefi og við sjáum til með skólann á morgun ...

Hvernig sleppa á úr gildrunni

2010-01-30T00:44:00.000Z

Kominn heim úr skólanum þessa vikuna. Það má reyndar efast um að þetta hafi verið góð ferð því að þarna sat ég í minni fyrstu kennslustund hjá nýjum kennara. Fullur salur af áhugasömum nemum og kennarinn búinn að birta 100 blaðsíðna glærusýningu sem hann ætlaði að fjalla um í tímanum.
Þar sem ég sat og hlustaði á kennarann og horfði á hann keyra hverja glæruna á fætur annarri í gegnum skjávarpann um leið og hann þuldi upp fræðilegar upplýsingarnar, byrjaði athyglibresturinn að gera vart við sig og spurningar, athugasemdir og önnur óáran bullaðist fram í hugarholið.
Varirnar hófu að titra og tungan að ólmast en ég beit einbeittur saman kjálkunum. Ég skyldi ekki dæla út úr mér spurningaflóði í mínum fyrsta tíma hjá splunkunýjum kennara.

Sekúntu síðar sprungu flóðgáttirnar og ...

En fyrirgefðu vinsamlegast kennari. Má ekki segja að út frá póstmódernískri og menningararfslegri orðræðu þá hafi þessi aðili fyllilega rétt á því að halda þessu fram þó svo að þú segir hann ekki hafa neitt vit á þessu máli?

Kennarinn hikaði, tafsaði og þagnaði um stund. Horfði um stund út undan sér á þennan nýja ólátabelg í tímanum og svaraði svo loks:

Ég þykist vita hvert þú ert að leiða mig. Ég ætla ekki að svara þessu. Þetta er gildru spurning!

Svona fór um tilraun mína til að þegja og láta lítið fyrir mér fara. Eftir þetta héldu mér engin bönd og ég þagnaði ekki fyrr en tíma lauk og kennarinn varð að láta staðar numið á glæru 27.

Upplitsdjarfur í dag

2010-01-29T00:50:00.000Z

Akkúrat núna er ég að reyna að ná mér niður á jörðina eftir að stofnfundur Upplits - menningarklasa uppsveita Árnessýslu tókst svona líka afbragðsvel. Ekki er verra að vita til þess að samskiptasíðan sem stofnuð var á fésbókinni, fésbókarsíða Upplits, er nú þegar búin að fá nærri 100 skráða áhangendur og það á fyrsta sólarhring tilveru sinnar :)
Höfum verið að birta myndir og fréttir af starfinu til þessa og vonandi verður þetta vettvangur þar sem áhugamenn um menningarlíf uppsveitanna lætur í sér heyra.

Hulda

2010-01-25T23:51:00.001Z

Í einni heimsókna minna til Huldu ömmu gaukaði hún að mér afriti af fallegu ljóði sem bar nafn hennar. Undir ljóðin titlar höfundur sig einungis sem Sumargestur.
Hún sagði mér að kunningi hennar og afa hefði einhvern tíma ort þessa vísu eftir að hafa vitjað þeirra en ekki látið neitt uppi við þau um kveðskapinn. Ljóðið barst henni svo seinna eftir að það hafði verið gefið út í ljóðabók eftir viðkomandi.

Ég hafði skrifað hjá mér að þessi vildarvinur afa og ömmu hefði heitið Finnbjörn Arndal en fann ekki neinar upplýsingar um hann. Hins vegar fann ég ljóðskáld og Hafnfirðing er hét Finnbogi J. Arndal (1877-1966). Finnbogi þessi gaf út nokkrar ljóðabækur: Bænarsálmur: (Einkum ætlaður til söngs við jarðarfarir) (1943), Milli skúra: Ljóðmæli (1954, endurpr. 1956), Kvöldblær: Ljóðmæli (1957) og Síðustu sporin: Ferðasaga og ljóð (1963).

Nú hef ég ekki þessar bækur undir höndum en mér þykir líklegt að hann hafi samið þetta fallega kvæði um hana ömmu mína og ef einhver skyldi finna í hvaða ljóðabók það er má sá hinn sami endilega láta mig vita - nú eða leiðrétta mig.

Hulda

Á sólbjörtum sunnudags morgni

jeg sá úti í garðinum mey.

Hún valdi þar björtustu blómin.

Jeg beið, en hún sá mig þó ei.

Hún batt úr þeim blómvendi fagra
og brosandi leit yfir tún.
Hún fann ekki, frjálshuga meyjan,
að fegursta blómið var hún.

Því sakleysið sveipaði hvarminn
og sólskinið lokkanna flóð,
sem bærist í blævindi þýðum,
í barmi svall ósnortin glóð.

Hver saklaus og siðfáguð meyja
er sveitanna fegursta blóm,
sem umhverfið unaði fyllir
og á sína töfra og hljóm.

Sumargestur.

Hef aldrei lent í verulegum átökum

2010-01-25T00:04:00.000Z

Ofangreindan titil fann ég á viðtali sem tekið var 2. febrúar 1964 við Stíg Sæland langafa minn (30. nóv. 1890-21. apr. 1974).
Hann starfaði fyrst sem sjómaður frá fermingu og síðar formaður þar til hann hóf störf í Hafnarfirði, fyrst sem lögregluþjónn (1920-1946), fangavörður (1946-1961) og að lokum við innheimtustörf og sem stefnuvottur áður en hann fluttist til barnanna, síðast Eríks afa og Huldu ömmu.
Stígur var ekki mikill fyrir mann að sjá og því var merkilegt hvernig honum gekk að halda uppi aga í Hafnarfirði þar sem hann var eini lögreglumaðurinn á svæðinu. Sjálfur segir hann aðalstarfið hafa falist í því að slökkva á götuljósunum á næturnar. Þessar fáu róstur og fyllerí sem voru yfirleitt í Gúttó voru leyst með því að langafi fékk kunningja sína úr salnum til að aðstoða sig við að ryðja hann. Ef hann rakst aftur á móti á byttur á rangli um bæinn fór hann oft með þær heim til sín þar sem Sigríður hellti upp á kaffi fyrir gestina.

Hljómeyki

2010-01-24T02:31:00.000Z

Stakk af út úr kennslustund í dag til að komast austur í Skálholt og hlusta þar á Hljómeyki flytja fjögur lög sem kórinn hefur flutt oft áður við Sumartónleikana í Skálholti en formlegt samstarf hefur verið við sönghópinn allt frá 1986.
Fékk þann heiður að kynna þennan glæsilega kór inn þar sem tónleikarnir voru hluti af sýningunni Endurreisn Skálholts. Hljómeyki söng undir stjórn Magnúsar Ragnarssonar lög eftir Báru Grímsdóttur, Elínu Gunnlaugsdóttur, Óliver Kentish og Jón Nordal. Fyrri tónskáldin þrjú voru á staðnum ásamt rúmlega 50 gestum og ég það var hreinlega frábært að hlusta á kórinn syngja. Alveg magnaður sönghópur.

Frænkufæðing

2010-01-23T00:29:00.000Z

Snáðinn og ég erum núna staddir hjá Tengdó á meðan Spúsan og Prinsinn kanna skemmtanagildi Þorrablótsins heima í Tungunum. Skilst að skemmtiatriðin hafi gegnið ljómandi og það hafi verið mikið hlegið.

Ekki skemmir að ný frænka bættist við í sístækkandi ættarhópinn.
Til hamingju Heiða og Axel, vona að þessi verði jafn mikill sprelligosi og systkini hennar.

Þorrablótsmenningararfurinn

2010-01-22T01:38:00.000Z

Sit og hamra vitskerta grein um menningararf. Eina sem ég kemst að niðurstöðu um er að það sé ekki hægt að komast að niðurstöðu um hann. Er vonandi sammála kennaranum sem lofaði okkur nemunum að við vissum vart hvað snéri upp né niður um menningararf að námskeiðinu loknu.
Spúsan var að tölta heim að skemmtiæfingu lokinni þegar kl. er rúmlega 1:30. Sóknin okkar sér um skemmtiatriði á þorrablótinu annað kvöld og hún lofar því að þau verði fantafín. Ég tek hana trúanlega þar sem ég þekki þá sem standa að þeim en því miður verð ég að skólast í borginni að meðan sveitungarnir skemmta sér (Grenjjj)

Tíðindalaust af heimavígstöðvunum

2010-01-21T00:40:00.003Z

Líkt og margir landsmenn fylgist ég með boltanum þessa stundina. A-Evrópa er sannarlega að koma sterk inn. Frakkar, Þjóðverjar, Svíar og Íslendingar í megnustu erfiðleikum. Verður spennandi að sjá hvort þessi lið eigi eftir að gera einhverjar rósir í milliriðlum.

Af heimavettvangi er annars allt þokkalegt. Spúsan nennti ekki að hengslast heima í sveitinni - enda ekkert þar um að vera - og skaust til Stórborgarinnar til að æra mann og annan með Hósku vinkonu sinni.
Ég greip tækifærið á meðan og fékk Snáðann til að svæfa mig ...

Aumt karlalíf

2010-01-19T23:43:00.002Z

Við heimaliggjandi karlarnir eigum nú aumt líf.

Snáðinn liggur og veltir sér. Getur ekki sofnað eftir öfluga fótboltaæfingu í íþróttahúsinu í dag. Strákurinn þeyttist þar um og sparkaði í allt sem fyrir varð á táslunum enda vitaskuld ekki með skó með sér.
Svo fór að í kvöld skartar hann tvöfaldri stærð á stóru tánum í formi mikilla vatnsfylltra blaðra. Hugsa að hann eigi eftir hugsa mikið um tærnar á sér þar til hann kemst næst út á sparkvöllinn.

Ég er sjálfur búinn að vera að leita út um allt húsið að skólabókum Snáðans. Það er náttúrulega agalegt þegar hann finnur engan skapaðan hlut.

Eftir að hann hafði verið skólabókarlaus í nokkra daga, snéri ég herberginu hans á hvolf en ekkert fannst. Opnaði meira að segja skólatöskuna hans og kíkti ofan í hana en ekki voru bækurnar hans þar!

Hringdi því í kennarann hans og sagði farir okkar feðga ósléttar mjög. Hún sýndi okkur mikinn skilning og eyddi næsta klukkutímanum í að leita víðs vegar um skólann en ekkert fannst.

Eftir hugarvíl og angur var víst ekki lengur umflúið að snúa sér til Spúsunnar og viðurkenna fullkominn ósigur.

Það hnussaði í minni. Hún skundaði inn í herbergi Snáðans, tók skólabækurnar hans upp af skrifborðinu og skikkaði hann til að fara að læra eins og skot!

Brottflutningar að hefjast ?!

2010-01-19T00:33:00.005Z

Snótin hefur látið í það skína undanfarið að hún sé að flytja á brott frá okkur gamla settinu.
Við erum náttúrulega miður okkar enda er þau skilaboð sem aldnir foreldrarnir vilja síst fá frá ástkærri dóttur sinni þegar hún er á ferðalögum og ýmisskonar flandri þessi:

Það er dásamlegt hérna!
Ég kem aldrei heim aftur!!!

Rökstuðningur óskast

2010-01-17T23:59:00.004Z

Í Kastljósinu á fimmtudagskvöldið var var ágætis umfjöllun um hollustu mataræðis. Sigmundur Guðbjarnarson lífefnafræðidoktor og fv. Háskólarektor mætti og sýndi nokkar gerðir ávaxta og grænmetis sem þykja afskaplega hollir.
T.a.m. eru sítrónur góð forvörn við blóðtappa og vínber eru mjög góð við frumuvexti krabbameinsfruma. Einnig léttvínið sem er bruggað úr þeim en Sigmundur lét þau orð falla að það gæti maður gert ef maður hefði næg fjárráð til þess.

Kastljósviðtalið við Sigmund

Sú spurning sem vaknaði náttúrulega í huga mér er hvort sé hagkvæmara að borða vínber eða drekka t.d. rauðvín. Nú kostar kílóið af vínberjum í Hagkaup um það bil 900 kr. en ein belja af Gato Negro rauðvíni kostar 5.400 kr.
Það eru þrír lítrar í beljunni og sem samsvarar fjórum vínflöskum í beljunni en venjulega eru um fjögur glös í hverri flösku.

Því kostar glasið 5.400/16 = 337 kr.

Lauslega áætlað samsvara því þrjú glös af rauðvíni einu kílói af vínberjum.

Þá er komið að spurningu kvöldins:
Í fyrirbyggjandi baráttu minni við krabbamein, hvort er þá skynsamara að drekka eitt rauðvínsglas daglega eða borða nálægt 300 grömmum af vínberjum?

Rökstuðningur óskast

Pat og Mat

2010-01-15T00:15:00.007Z

Ég er það sem kalla má "Handlaginn heimilisfaðir." Í þeirri merkingu að hendurnar eru vel lagaðar.
Ætlunin var nú ekki að dást að höndunum mínum eða tjá sig um handsnyrtingu heldur einfaldlega hnykkja á því að handlaginn heimilisfaðir þýðir það - akkúrat það í mínu tilfelli - og ekkert meir.

Hef undanfarnar daga - ókey, vikur - glímt við óþæga uppþvottavél en síðdegis komst ég að því hvað var að angra vélarskrattann. Það reyndist þá vera fyrri "viðgerð" mín sem virkaði vel á sínum tíma en ekki lengur.

Það er alltaf dásamleg tilfinning að grúska í gömlum forboðnum tækjum, fullum af ryki og drullu, vírum og flækjum og mystískum vélum sem virka á furðulega máta. Það var því meiri háttar áfangi að fá hugljómun, sannkallað Eureka, og vera búinn að leysa vandann.

Þá var bara eftir að gera við græjuna. Í ljós kom að ég hefði mátt gera við vélina á dulítið, obbolítið, öðruvísi máta í denn en núna small þetta saman og ég gat ruslað vélinni upp eins og ekkert væri. "Lagaði" meira að segja nokkur önnur smáatriði til viðbótar mér til stolts og óblandinnar ánægju.

Ég verð að segja það að fátt gefur manni jafn mikla ánægju og fullnægju tilfinningu og að ljúka góðum degi með glæsilegri viðgerð og afbragðs uppþvottavél.
Ég rúllaði því vélinni inn í skotið sitt, tengdi slöngurnar, stakk í samband og setti hana af stað.

Og þreifaði mig um í blindamyrkri mínútu síðar til að finna rafmagnsinnstunguna á vélarræskninu til að rífa hræið úr sambandi og slá síðan lekaliðanum aftur í samband.

Á meðan ég stóð í þessu varð mér mikið hugsað til félaganna Pats og Mats sem fengu hið óvirðulega viðurnefni "Klaufabárðarnir." Þessir tékknesku grínþættir höfðu óviðjafnanlegt upphafsstef auk þess sem óborganlegt vinnustef þegar þeir voru að bauka eitthvað saman. Fyrir þá sem hafa áhuga þá má finna stutta ræmu hér þar sem sýnt er hvernig þættirnir voru gerðir en í það sem er mér eftirminnilegast við þessa félaga er að sama hvað gekk á þá létu þeir aldrei hugfallast - sama hvað gekk á!

Því ætla ég mér að gera við vélargarminn!
Ég skal - ég mun - ég vil og ég get ...
kannski.

Litla pabbastelpan

2010-01-13T22:31:00.003Z

Nú þegar ég er að nálgast það að verða miðaldra faðir táningsdóttur þá er það að renna upp fyrir mér hvað pabbagrínið í bíómyndunum er í rauninni satt og rétt - í raun grafalvarlegt.
Í mínum augum er Snótin bara 12 ára barn sem er alltaf góð og þæg pabbastelpa, fer aldrei út á kvöldin og er álíka stór að vexti.
Þessu fékk Snótin að kynnast þegar hún hringdi úr menntaskólanum og bað mig að senda sér föt í einum grænum með næsta bílfari því hún var að fara í skíðaferðalag með skólafélögunum og bara varð að fá þennan fatnað.

Þetta var nú lítið mál enda geri ég allt fyrir litlu pabbastelpuna mína!

Því varð ég meir en lítið hissa þegar hún hringdi í mig, alveg snakill, vegna þess að hún hafði hætt að nota þessar druslur fyrir fjórum árum!!!

Kvikmyndasnillingarnir

2010-01-13T00:26:00.003Z

Snáðinn var að sýna mér tölvupóst frá hönnuði tölvuleiksins Swords and Sandals þar sem hann hrósaði honum og Helga fyrir skemmtileg myndbönd, hér og hér.
Hönnuðurinn sem býr í Ástralíu er að vinna að næstu útgáfu leiksins og sagðist hann vera að íhuga að bæta þeim frændunum inn í leikinn því myndbönd þeirra væru í sérstöku uppáhaldi hjá honum og léttu honum lund.
Snáðinn var að rifna úr stolti enda er þetta frábært framtak hjá strákunum.

Frændafæðingar og kvikmyndagerð

2010-01-11T23:44:00.003Z

Góðar fréttir frá Noregi. Fæddur er í dag, frændi þar sem mun fá í kennitöluna sína rununa 110110. Væntanlega upprennandi tvíundarsnillingur þar á ferð. Innilegar hamingjuóskir til foreldranna, afanna og ammanna og allra hinna.

Samanborið við þessar fréttir fer maður hjá sér við að benda á nýjustu kvikmynd Snáðans í samvinnu við Helga frænda sinn sem sjá má hér. Þeir gerðu aðra slíka fyrir nokkru síðan og létu nú tilleiðast til að endurtaka verkið vegna áskorana hönnuðar tölvuleiksins sem kvikmyndin er gerð til heiðurs.

Gráminn

2010-01-11T00:37:00.003Z

Helgin að baki og nú er að vinda ofan af sér.

Unglingarnir komnir aftur á Vatnið og nú skal tekið á því. Bæði með sameinað prógramm í ræktinni og svo mæta þau saman að sprikla og taka á því - og dásamlegt til þess að hugsa hvað þau hafa gaman af því að rækta líkama og sál saman.

Spúsan komin alsæl heim úr kórbúðunum og mér heyrðist sem að þetta hefði verið æðislegur hittingur og upprifjanir gamalla tíma og ævintýra.

Framundan er að glíma við gráa vikuna. Snáðinn er ekkert of sáttur við það sem sjá má af því að hann situr enn glaðvakandi í rúminu sínu og hlustar á Harrý og Heimi. Sé fyrir mér að annað kvöld leggist ég ofan á hann og liggi þar til hann sofnar. Sennilega dugar ekkert annað.

Helgardjammið

2010-01-10T01:49:00.003Z

Sat á fyrirlestri í dag um þrasgirni og skaphita Íra og hve gaman þeir höfðu af því að rífast innbyrðis um allt mögulegt sín á milli.
Á meðan fóru unglingarnir sem stormsveipir um útsölurnar í höfuðborginni en komu engu að síður þaðan út þess fullvissir um að þau væru ríkari en áður var. Fattaði ekki alveg útreikninginn hjá þeim en þetta hefur sennilega eitthvað með það að gera að þau eru að læra stærðfræði á náttúrufræðibraut í ML en ég er sagnfræðingur.
Spúsan nýtur sín hins vegar í botn á kórbúðum Kammerkórs Suðurlands á Hótel Örk þar sem verið er að búa sig undir Myrka músíkdaga. Vonum bara að hún syngi sig ekki hása, hún verður að geta tjáð sig almennilega við grislingana sína sem hún rembist við að troða full af þekkingu.

Gagnrýnandi af lífi og sál

2010-01-09T01:19:00.004Z

Krakkarnir komnir af leiksýningu og þokkalega sáttir. Reyndar skemmtu unglingarnir (Prinsinn og Helga) sér best en þeim yngsta fannst þetta svona lala. Útvarpsþættirnir sem hann kunni orðið utanað voru miklu betri.
Stuttu síðar ældi hann magafylli en ég held samt að honum hafi nú ekki þótt leiksýningin svo léleg.

Föstudagurinn langi

2010-01-07T23:40:00.003Z

Á morgun hefst föstudagurinn langi.
Skólinn byrjar kl. 15 hjá mér og er fram á kvöld en þá hefst skemmtunin hjá börnunum því þau fara þá í Borgarleikhúsið á þetta leikrit. Það verður pottþétt hlegið dátt og ekki sakar að frænkurnar Helga og Áslaug Alda sitja með þeim.

Hreingerningar

2010-01-07T00:15:00.005Z

Uppþvottavélin gerði tilraun til að eyða upp plastílátunum okkar. Sennilega er hún öll í þessu lífræna og hringrásar bulli og hefur viljað hreinsa þessa óværu.
Við Spúsan létum þetta þó ekki stoppa okkur í að fjarlægja jólin af heimilinu. Var fljótgert, tók mesta lagi 15 mín. Get ekki að því gert að fyllast stolti yfir minimalískum jólaskreytingum okkar.
Um kvöldið lagðist ég inn til Snáðans og lét hann svæfa mig við góða sögu. Þetta er orðið að hefð hjá okkur feðgunum og svo vaknar hann klukkan sjö að morgni og fer í sturtu áður en hann fer í skólann.

Afrekaskrá ársins opnuð

2010-01-04T00:03:00.004Z

Fyrsta helgi ársins að baki og fyrsta spriklið sömuleiðis.

Við hjónin skelltum okkur í íþróttahúsið og lékum okkur þar um stund með Snáðanum. Fín skemmtun og gamlir taktar við körfu-, fót- og handbolta rifjaður upp auk þess sem við tókum á því í bandí.

Svakastuð og ég afrekaði meira að segja að haka við fyrstu íþróttameiðslin fengin á árinu á listanum mínu yfir væntanlega afrekaskrá ársins.

Skjótt skipast veður í lofti

2010-01-02T21:20:00.004Z

Nú þegar þetta er spilað þá er verið að halda spilakvöld á heimilinu.

From Heimili

Augnabliki síðar var Snáðinn búinn að rusla púslinu niður á gólf, brjóta rauðvínsglas fullt af víni, sópa útskorna taflinu niður á gólfið auk myndar og náttúrulega sulla rauðvíni yfir allt þetta ásamt skjölum, bókum og möppu.

Nokkuð vel af sér vikið

Viðsnúningar

2010-01-01T23:34:00.002Z

Nýi í nýja ári hafinn.
Slagurinn við að rétta sólarsnúninginn hjá Snáðanum hafinn. Búinn að liggja á honum 2 klst. til að reyna að svæfa hann. Búinn að gefast upp í kvöld. Höfum 3-4 daga áður en skólinn hefst hjá honum til að fá hann til að sofna að kveldi til.
Bróðir hans tekur þessu nú mun rólegar enda hefur hann ekkert vaknað í dag til að minna sig á það að fara að sofa snemma í kvöld og gerast dagvera að nýju.

Peningapúkinn

2009-12-30T01:57:00.002Z

Snáðinn átti erfitt með að festa svefn sem fyrr svo að hann fann sér verk til dunda sér við. Fannst pyngjan vera heldur létt svo að hann hjakkaði úr sér eina tönnina og kom svo fagnandi fram kl. 1:30 með hana í hendinni:

Nú fæ ég pening frá tannálfinum!

Þjóöarskömm

2009-12-29T00:11:00.003Z

Staddur í höfuðstaðnum enda var ég kominn með fráhvarfseinkenni frá skólanum.

Settist þó inn á smá ráðstefnu um Náttúrufræðisafn Íslands sem Hið íslenska náttúrufræðifélag hélt í Þjóðmenningarhúsinu.
Áhugaverð erindi voru haldin þar af Kristínu Svavarsdóttur, Guðmundi Páli Ólafssyni, Sigurjóni Baldri Hafsteinssyni og Ólöfu Ýr Atladóttur. Án þess að fjalla meir um þau eru aðaltíðindin náttúrulega þau að það skuli ekki vera til sýningarsafn á náttúru Íslands.

Það er hrein og klár þjóðarskömm

Orgía

2009-12-27T18:27:00.002Z

Jólaorgíunni að ljúka.
Eftir stöðugt ættingja-, vina-, matar- og spilasukk síðustu daga er við hjónin farin að slappa pínulítið af. Spúsan er lögst í púslið og ég byrjaður að skrifa jóla- og nýjárskveðjur. Allt skal sinn tíma hafa.
Fjölskyldan er búin að njóta samverunnar síðustu daga. Aðallega í því að sofa út, éta og hlæja saman. Þegar dagur er liðinn að kveldi fer fiðringur að gera vart við sig á meðal unglinganna, símar að hringja og bílar að birtast.
Við gömlu sitjum eftir heima og púslum. Tími Sálarballa er liðinn hjá okkur.

Já. Sæll

2009-12-03T23:44:00.004Z

Hér er komin ný-aldar gömul uppþvottavél. Flott græja sem lætur lítið yfir sér þrátt fyrir að hafa ekki verið notuð í bráðum fimm ár.
Heyrist meira að segja minna í en ekkert og ekki þarf að fara út úr eldhúsinu til að geta spjallað saman á meðan hún sér um eldhúsverkin.
Reyndar höfðum við ekki mikinn tíma til að prufukeyra vélina áður en rafmagnið sló út og vatnið fossaði um gólfið - en virkaði voða flott þangað til.
Eftir að hafa skoðað vélina hringdi ég í varahlutaverslunina til að inna eftir hve marga mánuði við yrðum að bíða eftir varahlut.

Þú ert heppinn. Við vorum að fá rétta hlutinn í síðustu viku.

Mér létti mikið og strauk svitann af enninu, en hvað skyldu herlegheitin kosta?

Jaaá. Nú yrði ég ekki hissa þó þú segðir "Já. Sæll" Þetta fyrirferðarlitla dót kostar heilar 7.800 kr. ...
ehemm. En sennilega er annað hvort að velja á milli burstans eða þess að punga út þessari upphæð!

Ojjj barasta

2009-12-02T23:36:00.002Z

Ojjj, það er bara súkkulaði!

Ég verð að viðurkenna að mér hlýnaði um hjartarætur við að heyra þetta vonbrigðarvein hjá Snáðanum.
Hann hafði fengið gefins Jóladagatal sem merkt var MU-liðinu í jólalitunum. Ekkert stóð utan á því hvað væri að finna í dagatalinu á hverjum degi en strákurinn var búinn að bóka það að þarna leyndist eitthvað dásamlega spennandi fyrir ungan aðdáanda ensks knattspyrnuliðs.
Því voru vonbrigði hans mikil á Fulleldisdaginn þegar fyrsta gjöfin kom í ljós.

Skaðræðis Skassið hún Skvísa

2009-12-02T00:40:00.004Z

Líkt og sumir lesendur hafa orðið varir við þá er kominn köttur í ból bjarnar, bókstaflega.
Hér er ég að tala um nýja páfagaukinn sem við fengum okkur til yndis og ánægjuauka.

Það byrjaði voða vel þegar Matti mætti með kerlinguna og setti hana inn í búrið hjá honum Sóða okkar. Það lifnaði heldur betur yfir karlgreyinu. Hvað var að tarna?! Var ekki komin ung og sæt kella í búrið til hans!
Hann lyftist allur upp og gerði sig breiðann. Byrjaði á því að heilsa henni kurteisislega og spígspora ...

og skassið stökk á hann og hrakti hann út í horn á búrinu. Ekkert kvennastúss hér, takk fyrir!

Þannig hefur þetta síðan gengið. Karlinn hélt sig í góðri fjarlægð frá skassinu en við vorum ekki eins skynsöm heldur reyndum stöðugt að fá hana til að setjast á puttana á okkur ...

og uppskárum útbitnar hendur og opin sár sem fljótlega fór að grafa í!

Við áttum enn eftir að gefa kerlingunni nafn og ég lá ekki á góðum hugmyndum: Skass, Skaðræði o.s.frv.

En svo gerðist undur og stórmerki. Við hleyptum henni út og allt í einu róaðist skassið. Sat á puttanum á okkur og skoðaði umhverfið afskaplega forvitin ...

og beit svona rétt til málamynda og eins og af gömlum vana.

Nú var björninn unninn og hjörtu Spúsunnar og Snáðans brædd svo að kerlingin fékk nafnið Skvísa.

Ungdómur vor er í hættu

2009-11-29T22:57:00.004Z

Átti ákaflega fróðlegt spjall við gott og málsmetandi fólk um Netheimana. Ekki síst um netleiki á borð við Eve Online og samfélagsmiðlana.
Í umræðuhópnum voru margir mér fróðari og eldri en tvævetur og þó var ég ekki unggæðingurinn í hópnum.
Höfðu sumir ímugust á netleikjunum og töldu þá stórhættulega. Aðrir krossuðu sig í bak og fyrir er þeir heyrðu minnst á fyrirbæri eins og Facebook. Eitt vorum við þó öll sammála um og það var hve hættulegur tímaþjófur Netheimurinn væri, og áður en maður vissi af þá væru heilu klukkutímarnir þotnir hjá. Þetta væri stórhættulegt gagnvart ungdóminum.
Ég, sagnfræðingurinn, náttúrulega Varð að benda á að við sem foreldrar værum eflaust í sömu sporum og fereldrar hippakynslóðarinnar og að horfa upp sömu stórhættulegu aðstæður og þessir öldnu foreldrar töldu sig vera í í denn.
Öll urðum við þó að viðurkenna að við réðum litlu um framtíðina en þó helst gátum við haft áhrif á börn okkar og hvaða umgengnisreglur þau temdu sér gagnvart tölvum og netinu í dag.

Tónar, hljómfagrir og gargandi

2009-11-27T00:53:00.005Z

Við hjónin fórum á tónfund hjá tónlistarnemum í Tónlistarskóla Árnessýslu. Mikil og góð skemmtun. Miklar framfarir hjá sumum nemendunum og frábær tónlistarflutningur. Snáðinn stóð sig líka mjög vel og vonandi kem ég puttaleikfimi hans inn á netið.
---
Síðan koma að því sem var viðbúið. Nýr páfagaukur kominn á heimilið! Það fer ekki á milli mála að um er að ræða kerlingu. Þegar hún kom var hún gargandi og þegar hún var sett í búrið til Sóða gamla þá réðst hún á hann og hrakti hann á undan sér þó hann reyndi að gera sig mannalegan og bjóða hana velkomna á páfagaukísku.
Við höfum öll sömul lagst undir sama feld til að reyna að finna hentugt nafn á kerlu. Uppástungur á borð við Vargur hafa verið ofarlega en bíðum og sjáum til.

Mál málanna ... er dagatal

2009-11-25T00:44:00.003Z

Fréttin eina og aðalmál stórmálanna er Kvenfélagsdagatalið sem er að smella í sölu. Nú þegar á fyrsta kynningardegi eru Netheimar byrjaðir að titra af eftirvæntingu og spenningi.
Ég læt ekki mitt eftir liggja. Búinn að setja mynd af dömunum á Skrifborðsplötuna í ferðatölvunni minni og aðra í skjásvæfuna svo að tölvan vekji næga eftirtekt í háskólanum ;)

Gjöra skal það sem strútarnir gjöra ...

2009-11-24T01:04:00.003Z

Ég nota óspart almenningsvagnakerfi stórborgarinnar og á vart nógu góð lýsingarorð til að tjá hrifningu mína af því. Ef ég slysast til Krummaskuðsins þá legg ég drossíunni sem fyrst og hoppa um borð í strætóinn.

Kostirnir eru margir ss.: Ekkert stress, forgangsakstur í háannatíma, minni kostnaður, get notað tímann í annað en keyra, umhverfisvænna ofl. ofl.

Um daginn varð ég þó undrandi eða kannski sjokkeraður.
Ástæðan var sú að þegar ég kom inn í vagninn sá ég að bílstjórinn var að taka upp farsímann. Þurfti augsýnilega að tala við kunningja sinn. Hann hafði því miður ekki handfrjálsan búnað svo hann hélt símanum við eyrað á meðan hann keyrði en þetta var traustur bílstjóri og vanur að sjá svo ég hafði ekki tiltakanlegar áhyggjur. Nema ef ekki hefði verið ...

sá háttur hans að tala tala með miklum áherslum og ákafa í símtækið sem hann gerði með bendingum og öðru til þess hentugu handapati - með lausu hendinni (þ.e.a.s. þeirri sem hélt Ekki á símanum).

Ég tel mig hafa lært mína lexíu af þessari ferð.
Núna þegar ég sest í strætó þá sný ég alltaf aftur í vagninn svo ég þurfi ekki að fylgjast með símaati bílstjórans. Mér líður mikið betur.

Handlaginn heimilisfaðir

2009-11-19T00:26:00.003Z

Hvað gerir maður þegar uppþvottavélin bilar?
Spyr sá sem ekki veit.
Ég byrjaði náttúrulega á því að stinga eyrnatöppum í eyrun. Það skapaði fína vinnustemningu og minnkaði ytri hljóðtruflanir.
Síðan dró ég uppþvottavélina fram undan eldhúsborðinu og braut afrennslisslönguna í spað.
Eftir að hafa þannig fengið frið fyrir óþarfa áreiti vegna vélaviðgerða til að sinna hugðarefnum fór ég að lokum og fékk lánaða aðra slöngu til að tengja við vélina.
Komst þá að því að vélin var ennþá jafn biluð og áður.
Stóð nokkra stund og klóraði mér í hausnum og velti þessu snúna vandamáli fyrir mér. Komst svo að þeirri snjöllu niðurstöðu að sennilega væri best að hringja í sérfræðinga á verkstæði þegar þeir væru við. Símatími þeirra hentaði hins vegar ekki vinnurithma mínum þar sem þeir voru búnir að loka þegar viðgerð minni á vélinni var lokið.
Sérfræðingarnir voru hins vegar snjallir og snöggir.

Hvað segirðu? Virkar hún ekki? Þá er hún ónýt! Þú verður að kaupa þér nýja!!!

Málið er sem sagt afgreitt og við hjónin þvoum nú upp í sameiningu. Hún sér um verklegu hliðina og ég veiti henni andlegan stuðning frá stórborginni.